Вітаем Вас на сайтах Міністэрства замежных спраў Германіі

Пасол Хутэрэр 22 сакавіка 2022 г. наведаў мемарыяльны комплекс “Хатынь”

22.03.2022 - Артыкул
Ускладанне вянка ў Хатыні
Ускладанне вянка ў Хатыні© Пасольства Германіі ў Мінску

79 гадоў таму, 22 сакавіка 1943 года, амаль усе жыхары беларускай вёскі Хатынь былі забіты немцамі і ад імя немцаў, іх дамы былі спалены. Толькі вясковы каваль Іосіф Камінскі і трое дзяцей перажылі знішчэнне вёскі і забойства яе жыхароў. Больш за 140 жыхароў вёскі, палова з іх – дзеці, сталі ахвярамі трагедыі 22 сакавіка 1943. Хатынь так і не была адбудавана. На месцы, дзе яна некалі знаходзілася, сёння ўражлівы мемарыяльны комплекс нагадвае аб недаравальным злачынстве Хатыні і больш за 600 беларускіх вёсак і іх жыхароў, якіх напаткаў такі ж лёс.

Ускладанне вянка ў Хатыні
Ускладанне вянка ў Хатыні© Пасольства Германіі ў Мінску

Пасол Германіі ў Беларусі Манфрэд Хутэрэр 22 сакавіка 2022 г., у гадавіну злачынства ў Хатыні, наведаў мемарыяльны комплекс. “Германія ніколі не забудзе тое, што адбылося тут ад імя немцаў. Боль невыказны. Я схіляюся перад Вамі”, сказаў Хутэрэр падчас свайго візіту аддаючы даніну памяці ахвярам. Пасол Хутэрэр усклаў вянок у гэтым памятным месцы. Разам з ім Хатынь наведала Часовы Павераны ў справах Прадстаўніцтва Еўрапейскага Саюза ў Беларусі Эвеліна Шульц і ўсклала кветкі.

Хатынь і іншыя спаленыя вёскі Беларусі – сімвалы амаль невымяральных пакут, прынесеных Беларусі і яе насельніцтву злачынствамі, здзейсненымі немцамі і ад імя немцаў у знішчальнай вайне супраць Савецкага Саюза. Мемарыяльны комплекс «Хатынь» дазваляе нашчадкам паспрабаваць прынамсі атрымаць уяўленне аб тым, што практычна немагчыма ўсвядоміць: дзеці, якія толькі што гулялі на вясковай вуліцы, а праз імгненне ўжо сталі ахвярамі забойніцкага вар’яцтва; дамы, у якіх людзі жылі, працавалі, адчувалі радасць, за некалькі гадзін разбураныя да падмурка; цэлая вёска, якая перастала ёй быць і ніколі больш не была адноўлена.

Памяць аб злачынствах, здзейсненых немцамі і ад імя немцаў з 1933 па 1945 гады ў Хатыні і ў іншых населеных пунктах, якіх занадта шмат, урад Германіі і яе грамадзяне захаваюць назаўсёды. Памяць аб мільёнах людзей, якія пакутавалі і загінулі ад нянавісці немцаў, антысемітызму і забойніцкага расісцкага вар’яцтва, Германія будзе захоўваць і шанаваць заўсёды. Германія прызнае сваю гістарычную адказнасць за гэта. З яе вырастае абавязак не дапусціць, каб такое калі-небудзь паўтарылася.

 

Да пачатку старонкі