Вітаем Вас на сайтах Міністэрства замежных спраў Германіі

Высновы Савета Еўрапейскага Саюза ў дачыненні да Беларусі

12.10.2020 - Артыкул

12.10. Савет Еўрапейскага Саюза прыняў Высновы ў дачыненні да Беларусі

12 кастрычніка Савет Еўрапейскага Саюза прыняў Высновы ў дачыненні да Беларусі. У Высновах Савета зноў адзначаецца, што прэзідэнцкія выбары 9 жніўня былі несвабоднымі і несправядлівымі і што Аляксандр Лукашэнка не мае ніякай дэмакратычнай легітымнасці. Савет зноў заяўляе пра поўную падтрымку суверэнітэту і незалежнасці Беларусі і падкрэслівае дэмакратычнае права беларускага народа абраць свайго прэзідэнта на новых, свабодных і справядлівых прэзідэнцкіх выбарах, без знешняга ўмяшальніцтва.

Савет рашуча асуджае гвалт, які ўжываецца беларускімі ўладамі супраць мірных дэманстрантаў, і заклікае да вызвалення ўсіх адвольна затрыманых асоб, у тым ліку палітычных зняволеных. У гэтым кантэксце Высновы нагадваюць пра абмежавальныя меры, уведзеныя ў дачыненні да 40 чалавек, адказных за сфальсіфікаваны характар прэзідэнцкіх выбараў і жорсткае падаўленне мірных пратэстаў, і заяўляюць пра гатоўнасць ЕС прыняць далейшыя абмежавальныя меры супраць суб'ектаў і высокапастаўленых чыноўнікаў, уключаючы Аляксандра Лукашэнку, калі сітуацыя не палепшыцца.

ЕС скароціць двухбаковае супрацоўніцтва з беларускімі ўладамі на цэнтральным узроўні, павялічыць сваю падтрымку беларускага народа і грамадзянскай супольнасці і адпаведным чынам перафарматуе сваю двухбаковую фінансавую дапамогу. Кіруючыся гэтым, ЕС неадкладна прадаставіў дадатковыя фінансавыя рэсурсы ахвярам гвалту, арганізацыям грамадзянскай супольнасці і незалежным СМІ.

У Высновах падкрэсліваецца, што ЕС гатовы істотна актывізаваць палітычнае ўзаемадзеянне, галіновае супрацоўніцтва і фінансавую дапамогу Беларусі пры ўмове выканання яе ўладамі прынцыпаў дэмакратыі, вяршэнства права і правоў чалавека шляхам спынення рэпрэсій і злоўжыванняў, прасоўвання сур'ёзнага, вартага даверу і інклюзіўнага палітычнага працэсу, які прыводзіў бы да свабодных і справядлівых выбараў пад наглядам БДІПЧ АБСЕ, і забеспячэння гарантый павагі правоў чалавека.

Нарэшце, ЕС заклікае беларускія ўлады да ўдзелу ў інклюзіўным нацыянальным дыялогу і гатовы падтрымаць мірны дэмакратычны пераход з дапамогай розных інструментаў, уключаючы ўсёабдымны план эканамічнай падтрымкі дэмакратычнай Беларусі.

Да пачатку старонкі